Sunnuhlíð

Rausnarleg gjöf Kvenfélagsins

Jóhann Árnason — Wed, 04 Apr 2012 14:02:01 +0000

Á aðalfundi Sunnuhlíðar þann 28. mars 2012 afhentu kvenfélagskonur gjöf til Sunnuhlíðar að upphæð kr. 1.000.00, sem er ágóði af fjáröflun þeirra. Þessi mjög svo rausnarlegu gjöf verður lögð inná nýstofnaðan minningargjafasjóð sem nota á til kaupa á tækjum og búnaði fyrir hjúkrunarheimilið. Ekki hefur verið tekin ákvörðun um hvað nákvæmlega verður keypt, en af nógu er að velja.

Konurnar í Kvenfélagi Kópavogs hafa alla tíð verið duglegar við að styrkja og styðja við starfsemi hjúkrunarheimilis á margvíslegan hátt, bæði með gjöfum og vinnuframlagi, sem þær eru ávallt reiðubúnar að leggja af hendi.

Stjórn og starfsfólk Sunnuhlíðar færir Kvenfélagi Kópavogs innilegar þakkir fyrir þessa rausnarlegu gjöf.

Aðalfundur Sunnuhlíðar

Jóhann Árnason — Mon, 19 Mar 2012 18:03:31 +0000

Aðalfundur Sunnuhlíðar verður haldinn miðvikudaginn 28. mars 2012. Til setu á aðalfundi eru boðaðir fulltrúar allra 11 aðildarfélaganna, bæði aðalmenn og varamenn, áheyrnarfulltrúi Kópavogsbæjar og stjórnendur Sunnuhlíðar.

Á dagskrá eru venjuleg aðalfundarstörf, lagðar verða fram skýrslur og ársreikningar ásamt því sem umræður verða um starfsemina, staða mála varðandi framkvæmdir, framtíðaráform o.fl.

Aufúsugestir

Jóhann Árnason — Mon, 19 Mar 2012 16:56:17 +0000

Miðvikudaginn 14. mars komu systur úr Soroptimistaklúbbi Kópavogs færandi hendi í Dagdvöl Sunnuhlíðar. Færðu þær Dagdvöl afrakstur kaffisölunnar frá því í nóvember að gjöf, kr. 100.000. Undanfarin ár hafa þær Soroptimistasystur verið með kaffisölu í tengslum við opið hús í Dagdvölinni (áður bazar) sem haldið er fyrsta laugardag í nóvember á hverju ári. Hafa þær alltaf gefið Dagdvölinni ágóðann að kaffisölunni (og gott betur) til að styrkja starfsemina.

Í Dagdvöl koma 18 manns á dag, en um 40 – 50 manns koma í hverri viku. Flestir koma tvisvar til þrisvar í viku, en sumir koma einu sinni og aðrir fjóra eða fimm daga vikunnar. Meðalaldur þeirra sem koma í Dagdvölina eru um 83 ár. Markmið Dagdvalar er að veita félagslega þjónustu sem miðar að því að draga úr eða varast félagslega einangrun og styðja fjölskyldur sem hafa aldraða ættingja heima. Starfskraftar og húsnæði miða við ákveðna færni einstaklinga, m.a. að viðkomandi þurfi ekki á hjúkrun að halda.

Soroptimistar eru framsækin og sveigjanleg alþjóðasamtök fyrir nútímakonur í stjórnun og öðrum sérhæfðum störfum. Soroptimistar stuðla að heimsmynd þar sem konur og stúlkur ná í sameiningu fram því besta sem völ er á, bæði sem einstaklingar og sem hópur, og þar sem þær geta látið drauma sína rætast og til jafns við aðra skapað sterk og friðsöm samfélög um allan heim.

Soroptimistaklúbbur Kópavogs er stofnaðili að Sunnuhlíðarstamtökunum og hefur styrkt starfsemi Sunnuhlíðar með margvíslegum og rausnarlegum hætti allt frá stofnun.

Sunnuhlíð færir systrum í Soroptimistaklúbbi Kópavogs innilegar þakkir fyrir gjöfina.

Hello world!

admin — Mon, 07 Nov 2011 22:33:10 +0000

Welcome to WordPress. This is your first post. Edit or delete it, then start blogging!

Biskup Íslands í heimsókn

Jóhann Árnason — Fri, 04 Mar 2011 14:44:11 +0000

Biskup Ísland, herra Karl Sigurbjörnsson, heimsótti Sunnuhlíð í byrjun febrúar. Var biskupinn að vísitera Kársnessókn, en heimilismenn í Sunnuhlíð tilheyra flestir þeirri sókn. Messaði biskup og í ræðu sinni talaði hann um ljósið sem hann tengdi við Sunnuhlíð og ræddi einnig hverfugleika lífsins og hve áríðandi er að láta birtuna í lífinu vera sitt leiðarljós.

Magnea Tómasdóttir söng nokkur lög við undirleik Lenku Mátéová kantor Kópavogskirkju. Að lokinni messu heilsaði biskup uppá heimilimenn og fræddist um starfsemi Sunnuhlíðar.

Helgistundir eru haldnar á hverjum fimmtudegi í Sunnuhlíð og skipta prestarnir í Kópavogi stundunum á milli sín. Þá hefur prestur Kársnessóknar messað á jóladag og mætt með kór og organista. Til aðstoðar prestum í helgistundum eru sjálfboðaliðar frá Rauðakrossinum, Kópavogsdeild og sjá þau einnig um söng og samveru á undan helgistundum. Þessar stundir eru ákaflega dýrmætar fyrir heimilismenn og eru þær alltaf vel sóttar.

Prestum í Kópavogi, sjálfboðaliðum og öllum þeim sem koma að helgihaldinum eru færðar kærar þakkir fyrir þeirra vinnu.

Bakað fyrir jólin

Jóhann Árnason — Fri, 04 Mar 2011 14:22:18 +0000

Heimilisfólkið í Sunnuhlíð bretti upp ermar og setti á sig svuntur þegar bakaðar voru smákökurnar fyrir jólin. Hnoðað, hrært, formað og skeggrætt á meðan kökurnar bökuðust í nýjum ofninum. Það var mikið fjör í bakstrinum og ekki sakaði hvað kökurnar brögðuðust vel.

Sunnuhlíð máluð

Jóhann Árnason — Fri, 04 Mar 2011 10:30:52 +0000

Félagar í Lionsklúbbnum Muninn hafa lokið við að mála hjúkrunarheimilið að utan. Þetta var í sjötta sinn sem klúbbfélagar gefa vinnu sína á þennan hátt. Í þetta sinn var verkið framkvæmt á tveimur sumrum, 2009 var tréverk á suðurhlið málað og vorið 2010 máluðu félagarnir norður og austurhlið hússins. Verkið var unnið í umsjá Más Guðmundssonar, málarameistara hjá G. Helgasyni ehf. Eins og áður gefur Málning hf. allt efni til vinnunnar. Verðmæti verkefnisins var metið að þessu sinni og reiknaðist mönnum til að framlag Munins til Sunnuhlíðar nemi um 3,8 milljónum króna.

Stjórn Sunnuhlíðar færir félögum í Muninn, Má Guðmundssyni og Málningu hf. innilegar þakkir fyrir fyrir þetta rausnarlega framlag þeirra til starfsemi Sunnuhlíðar. Verðmæti þessa framlags verður ekki aðeins mælt í peningum, heldur er sá hlýi hugur og tryggð við hjúkrunarheimilið sem gjöf þeirra fylgdi ómetanlegur.

Barnateppi til Malaví

dagmarm — Wed, 02 Jun 2010 21:37:43 +0000

Í vikunni kom fulltrúi frá Kópavogsdeild Rauðakross Íslands og sótti 82 barnateppi sem hafa verið prjónuð af heimilisfólki í Sunnuhlíð hjúkrunarheimili. Teppin fara í verkefnið föt sem framlag og verða send á vegum RKÍ með öðrum fatapökkum til barna og fjölskyldna í Malaví. Teppin hafa verið prjónuð úr afgangs garni sem Sunnuhlíð hefur verið gefið og því fylgir mikil ánægja hjá heimilisfólki að geta lagt öðrum lið á þennan hátt. En þetta er þriðja slíka sendingin sem fer frá hjúkrunarheimilinu.

Kirkjuferð með heimilisfólk

dagmarm — Wed, 02 Jun 2010 19:54:24 +0000

Á Uppstigningardag bauð Kópavogsdeild Rauðakross Ísland heimilisfólki í Sunnuhlíð ásamt aðstandendum í hina árlegu kirkjuferð í tilefni af kirkjudegi aldraðra. Eins og síðustu ár var farið í messu í Kópavogskirkju. Sjálfboðaliðar Kópavogsdeildarinnar ásamt starfsfólki Sunnuhlíðar aðstoðaði heimilisfólkið á leiðinni. Eftir messu var svo boðið upp á kaffiveitingar í safnaðarheimili kirkjunnar.

Nýr deildarstjóri

Jóhann Árnason — Mon, 24 May 2010 19:15:15 +0000

Þann 1. júní byrjar nýr deildarstjóri á Deild 1, sem eru Lundur, Hvammur og Þinghóll. Nýí deildarstjórinn heitir María Fjóla Harðardóttir. María hefur starfað sem hjúkrunarfræðingur á Eir að undanförnu, en áður var hún deildarstjóri á Hlévangi í Keflavík.

Við bjóðum Maríu velkomna til starfa og óskum henni velfarnaðar í störfum sínum í Sunnuhlíð.

Á síðasta ári sameinuðust Deild 1 og Deild 2 í eina deild og hafa Nína Björnsdóttir og Helga Ragnarsdóttir stjórnað deildinni í sameiningu. Báðar munu starfa áfram og verður Nína í hálfu starfi, aðalega á næturvöktum, en Helga verður í fullu starfi, mest á kvöldin og um helgar. Við viljum þakka þeim Nínu og Helgu fyrir góð störf sem stjórnendur og óskum þeim velfarnaðar í störfum sinum fyrir Sunnuhlíð.